Nuk
ნორმატინი / NORMATIN


წამლის ფორმა
თვალის წვეთები
აღწერილობა: გამჭვირვალე, უფერო სითხე

შემადგენლობა
პრეპარატის 1 მლ შეიცავს
აქტიური ნივთიერება:
თიმოლოლი (თიმოლოლის მალეატის ფორმით) 5 მგ
დამხმარე ნივთიერებები:
ნატრიუმის დიჰიდროფოსფატის მონოჰიდრატი, დინატრიუმის ფოსფატი უწყლო, ბენზალკონიუმის ქლორიდი, ნატრიუმის ჰიდროქსიდი, საინექციო წყალი.

პრეპარატის ათქ კოდი
S01ED01

ფარმაკოთერაპიული ჯგუფი
არასელექტიური ბეტა-ადრენობლოკატორი. გლაუკომის საწინააღმდეგო საშუალება.

ფარმაკოლოგიური თვისებები
ფარმაკოდინამიკა
თიმოლოლი წარმოადგენს ბეტა-1 და ბეტა-2 ადრენორეცეპტორების არასელექტიურ ბლოკატორს. ადგილობრივი გამოყენებისას პრეპარატი ამცირებს როგორც ნორმალურ, ასევე მომატებულ თვალშიგა წნევას. თვალშიგა წნევის დაქვეითება იწყება პრეპარატის ერთჯერადად ჩაწვეთებიდან 20 წუთში. მაქსიმალური ეფექტი მიიღწევა 1-2 საათში, მოქმედების ხანგრძლივობა შეადგენს 24 საათს.
თიმოლოლის მოქმედების ძირითადი მექანიზმი დაკავშირებულია წყალწყალა ნამის წარმოქმნის შემცირებასთან, ასევე მისი განდევნის მცირედ გაუმჯობესებასთან. მიოზური საშუალებებისგან განსხვავებით, თიმოლოლი თვალშიგა წნევას ამცირებს ისე, რომ პრაქტიკულად არ მოქმედებს აკომოდაციაზე და გუგის ზომაზე. 

ფარმაკოკინეტიკა
ადგილობრივი გამოყენებისას თიმოლოლი სწრაფად აღწევს რქოვანაში. უმნიშვნელო რაოდენობა ხვდება სისტემურ სისხლის ნაკადში კონიუნქტივის, ცხვირის ლორწოვანი გარსისა და საცრემლე გზების სისხლძარღვებში აბსორბციის შედეგად. მეტაბოლიტები, ასევე თიმოლოლის გარკვეული რაოდენობა უცვლელი სახით გამოიყოფა თირკმელების საშუალებით.

გამოყენების ჩვენებები
- მომატებული თვალშიგა წნევა (თვალის ჰიპერტენზია);
- ღიაკუთხიანი გლაუკომა;
- მეორადი გლაუკომა (მათ შორის გლაუკომა აფაკიურ თვალზე);
- დამატებითი საშუალების სახით დახურულკუთხიანი გლაუკომის დროს თვალშიგა წნევის დასაწევად (მიოზურ საშუალებებთან კომბინაციაში);
- თანდაყოლილი გლაუკომა (როდესაც სხვა თერაპიული ზომები საკმარისი არ არის).

გამოყენების წესი და დოზირება
თითო წვეთი დაავადებულ თვალში 2-ჯერ დღე-ღამეში. ვინაიდან თვალშიგა წნევის სტაბილიზაცია პრეპარატის გამოყენების დაწყებიდან რამდენიმე კვირის განმავლობაში ხდება, მკურნალობის ეფექტის შეფასება ტარდება 4 კვირის შემდეგ.
თუ რეგულარული გამოყენებისას თვალშიგა წნევა ნორმალიზდება, დოზირება მცირდება თითო წვეთამდე 1-ჯერ დღეში.

უკუჩვენებები
პრეპარატი უკუნაჩვენებია შემდეგ შემთხვევებში:
- პრეპარატის კომპონენტების მიმართ ჰიპერმგრძნობელობა;
- ბრონქული ასთმა (მათ შორის ანამნეზში);
- ფილტვების ქრონიკული ობსტრუქციული დაავადება;
- კარდიოგენული შოკი;
- გულის მწვავე და ქრონიკული უკმარისობა;
- II და III ხარისხის AV-ბლოკადა;
- სინოატრიალური ბლოკადა;
- სინუსური ბრადიკარდია (წუთში 45-50 დარტყმაზე ნაკლები);
- სინუსური კვანძის სისუსტის სინდრომი;
- რქოვანას დისტროფიული დაავადებები;
- ცხვირის ლორწოვანი გარსის მწვავე ალერგიული ანთება.

გვერდითი მოვლენები
ადგილობრივი რეაქციები: კონიუნქტივის გაღიზიანება და ჰიპერემია, ცრემლდენა, სინათლის შიში, ეპითელიუმის შეშუპება და რქოვანას ჰიპერემია.
სისტემური რეაქციები: იშვიათად ვლინდება.
გულ-სისხლძარღვთა სისტემის მხრივ: ბრადიკარდია, ბრადიარითმია, არტერიული წნევის დაქვეითება, კოლაფსი, ატრიოვენტრიკულური ბლოკადა.
სასუნთქი სისტემის მხრივ: ქოშინი, ბრონქოსპაზმი, ფილტვების უკმარისობა.
ცნს-ის მხრივ: თავის ტკივილი, თავბრუსხვევა.
ალერგიული რეაქციები: ჭინჭრის ციება, ეგზემა.

განსაკუთრებული მითითებები
აუცილებელია ექიმთან რეგულარული ვიზიტი თვალშიგა წნევის გაზომვისა და რქოვანას გამოკვლევის მიზნით.
თუ პაციენტი ატარებს რბილ კონტაქტურ ლინზებს, ნორმატინის თვალის წვეთების გამოყენება არ შეიძლება, რადგანაც კონსერვანტი შეიძლება მოხვდეს კონტაქტურ ლინზებზე და არასასურველი ზემოქმედება მოახდინოს თვალის ქსოვილებზე. 
პრეპარატის ჩაწვეთებამდე მყარი კონტაქტური ლინზები პაციენტმა უნდა მოიხსნას და კვლავ გაიკეთოს მხოლოდ 15 წუთის შემდეგ. 
ავადმყოფების ნორმატინით მკურნალობაზე გადაყვანის შემთხვევაში, მანამდე გამოყენებული მიოზური საშუალებების ეფექტების შემდეგ შეიძლება საჭირო გახდეს რეფრაქციის კორექცია.

ზემოქმედება ავტომობილის და სხვა მექანიზმების მართვის უნარზე
ნორმატინის გამოყენებისთანავე შესაძლებელია განვითარდეს მხედველობის სიმახვილის ხანმოკლე დაქვეითება, რაც იწვევს ფსიქომოტორული რეაქციების შენელებას. ამის გამო პრეპარატის გამოყენება არ არის რეკომენდებული უშუალოდ მექანიზმებთან მუშაობის და ავტოტრანსპორტის მართვისას.

გამოყენება ორსულობისა და ლაქტაციის პერიოდში
ნორმატინის თვალის წვეთების გამოყენება ორსულობის პერიოდში მხოლოდ იმ შემთხვევაშია შესაძლებელი, თუ თერაპიის მოსალოდნელი ეფექტი აღემატება ნაყოფისათვის პოტენციურ რისკს.
მკურნალობის პერიოდში ძუძუთი კვება უნდა შეწყდეს.

გამოყენება პედიატრიაში
ბავშვებში ნორმატინის გამოყენების უსაფრთხოება და ეფექტურობა არ არის დადგენილი.

ურთიერთქმედება სხვა სამკურნალო საშუალებებთან
სხვა სამკურნალო საშუალებების მიღებისას აუცილებელია კონსულტაცია მკურნალ ექიმთან. 

ჭარბი დოზირება
სიმპტომები: თავბრუსხვევა, თავის ტკივილი, არითმია, ბრადიკარდია, ბრონქოსპაზმი, გულისრევა, ღებინება.
მკურნალობა: სიმპტომური თერაპია.

გამოშვების ფორმა
გამოდის თვალის წვეთების სახით 5 მლ-იანი პლასტმასის ფლაკონში საწვეთურით და ხრახნიანი დამცავი თავსახურით.
ფლაკონი მოთავსებულია მუყაოს კოლოფში გამოყენების ინსტრუქციასთან ერთად.

შენახვის პირობები
ინახება არა უმეტეს 25°C ტემპერატურაზე, ბავშვებისათვის მიუწვდომელ ადგილას.
ფლაკონის გახსნის შემდეგ პრეპარატი გამოიყენება 1 თვის განმავლობაში.

ვარგისიანობის ვადა
2 წელი გამოშვების თარიღიდან.
არ გამოიყენება ვარგისიანობის ვადის გასვლის შემდეგ.

აფთიაქიდან გაცემის პირობები
ფარმაცევტული პროდუქტის ჯგუფი II – გამოიყენება ექიმის დანიშნულებით.


სად შევიძინოთ?