დაპალიფი / Dapalif
- საერთაშორისო დასახელება (აქტიური ნივთიერება): dapagliflozin
- კლინიკურ-ფარმაკოლოგიური ჯგუფი: ენდოკრინოლოგია → პერორალური ჰიპოგლიკემიური საშუალებები → სხვა ჰიპოგლიკემიური პრეპარატები
- მწარმოებელი კომპანია: NOBEL ILAC SANAYII VE TICARET A.S
- მწარმოებელი ქვეყანა: თურქეთი
- გამოშვების ფორმა: 10მგ აპკიანი გარსით დაფარული ტაბლეტი №28
- გაცემის რეჟიმი: II ჯგუფი (გაიცემა ფორმა N3 რეცეპტით)
დაპაგლიფლოზინი
რას წარმოადგენს დაპალიფი და რისთვის გამოიყენება
რას წარმოადგენს დაპალიფი
დაპალიფი შეიცავს მოქმედ ნივთიერებას დაპაგლიფლოზინს. ის მიეკუთვნება სამკურნალო საშუალებების ჯგუფს, სახელწოდებით „ნატრიუმ-გლუკოზას კოტრანსპორტერი 2-ის (SGLT2) ინჰიბიტორები“. ისინი თრგუნავს SGLT2 ცილის თქვენს თირკმელში. ამ ცილის დათრგუნვით თქვენი ორგანიზმიდან შარდის საშუალებით გამოიდევნება სისხლის შაქარი (გლუკოზა), მარილი (ნატრიუმი) და წყალი.
რისთვის გამოიყენება დაპალიფი
დაპალიფი გამოიყენება შემდეგი დაავადებების სამკურნალოდ:
ტიპი 2 დიაბეტი
მოზრდილებში და 10 წლის და უფროსი ასაკის ბავშვებში.
თუ ტიპი 2 დიაბეტის კონტროლი ვერ ხერხდება კვებით და ვარჯიშით.
დაპალიფის გამოყენება შეიძლება ცალკე ან დიაბეტის სამკურნალო სხვა პრეპარატებთან კომბინაციაში.
მნიშვნელოვანია თქვენი ექიმის, ფარმაცევტის ან ექთნის მიერ კვებასთან და ვარჯიშთან დაკავშირებული რეკომენდაციების დაცვა.
გულის უკმარისობა
მოზრდილებში (18 წლის და უფროსი ასაკი), როდესაც გულს არ შეუძლია სისხლის სათანადოდ ამოტუმბვა.
თირკმელების ქრონიკული დაავადება
მოზრდილებში თირკმელების დაქვეითებული ფუნქციით.
რა არის ტიპი 2 დიაბეტი და როგორ ეხმარება დაპალიფი?
ტიპი 2 დიაბეტის დროს თქვენი ორგანიზმი ვერ წარმოქმნის საკმარისი რაოდენობის ინსულინს და არ შეუძლია მისი სათანადოდ გამოყენება. ეს იწვევს სისხლში შაქრის დონის მომატებას. ეს იწვევს მძიმე დარღვევებს, როგორიცაა გულის ან თირკმელების დაავადება, სიბრმავე და სისხლის ცუდი მიმოქცევა თქვენს ხელებსა და ფეხებში.
დაპალიფის საშუალებით ხდება თქვენი ორგანიზმიდან ჭარბი გლუკოზის გამოდევნა. პრეპარატი ასევე ხელს უშლის გულის დაავადების განვითარებას.
რა არის გულის უკმარისობა და როგორ ეხმარება დაპალიფი?
გულის უკმარისობის ეს ტიპი ვითარდება იმ შემთხვევაში, როდესაც გულს არ შეუძლია სისხლის ამოტუმბვა და ფილტვებისთვის და მთელი ორგანიზმისთვის მიწოდება. ეს შეიძლება იწვევდეს მძიმე სამედიცინო დარღვევას და საჭიროებს ჰოსპიტალურ დახმარებას.
გულის უკმარისობის ყველაზე ხშირი სიმპტომები არის ქოშინი, დაღლილობის ან ძალიან გადაღლილობის მუდმივი შეგრძნება და კოჭების შეშუპება.
დაპალიფი ხელს უწყობს თქვენი გულის დაცვას, რათა უფრო არ დასუსტდეს, და აუმჯობსებს თქვენს სიმპტომებს. მას შეუძლია შეამციროს საავადმყოფოში მისვლის საჭიროება და ზოგიერთ პაციენტს ეხმარება სიცოცხლის ხანგრძლივად შენარჩუნებაში.
რა არის თირკმელების ქრონიკული დაავადება და როგორ ეხმარება დაპალიფი?
როდესაც გაქვთ თირკმელების ქრონიკული დაავადება, თქვენმა თირკმელებმა შეიძლება თანდათანობით დაკარგოს საკუთარი ფუნქცია. ეს ნიშნავს, რომ ისინი დაკარგავენ თქვენი სისხლის გაწმენდის და გაფილტვრის უნარს ისე, როგორც საჭიროა. თირკმელების ფუნქციის დაკარგვა შეიძლება იწვევდეს მძიმე სამედიცინო დარღვევას და საჭიროებს ჰოსპიტალურ დახმარებას.
დაპალიფი ხელს უწყობს თქვენი თირკმელების დაცვას, რათა არ დაკარგოს საკუთარი ფუნქცია. მას შეუძლია დაეხმაროს ზოგ პაციენტს სიცოცხლის ხანგრძლივად შენარჩუნებაში.
რა უნდა იცოდეთ დაპალიფის მიღებამდე
არ მიიღოთ დაპალიფი
თუ ხართ ალერგიული დაპაგლიფლოზინის ან ამ პრეპარატის ნებისმიერი სხვა ინგრედიენტის მიმართ (ჩამოთვლილია პარაგრაფში 6).
გაფრთხილება და სიფრთხილის ზომები
დაუყოვნებლივ დაუკავშირდით ექიმს ან უახლოეს საავადმყოფოს:
დიაბეტური კეტოაციდოზი:
თუ გაქვთ დიაბეტი და თავს შეუძლოდ გრძნობთ ან ხართ შეუძლოთ, გაქვთ ტკივილი კუჭის არეში, ძლიერი წყურვილი, სწრაფი და ღრმა სუნთქვა, დაბნეულობა, უჩვეულო ძილიანობა ან დაღლილობა, ტკბილი სუნი ამოსუნთქვისას, ტკბილი ან ლითონის გემო პირში, ან განსხვავებული სუნი შარდში ან ოფლში, ან წონაში სწრაფი კლება.
ზემოაღნიშნული სიმპტომები შეიძლება იყოს „დიაბეტური კეტოაციდოზის“ - იშვიათი, მაგრამ მძიმე, ზოგჯერ სიცოცხლისათვის საშიში დარღვევის - ნიშანი, რომელიც შეიძლება განვითარდეს დიაბეტის დროს თქვენს შარდსა თუ სისხლში „კეტონური სხეულების“ დონის მომატების გამო, რაც ანალიზებით ვლინდება.
დიაბეტური კეტოაციდოზის განვითარების რისკი შეიძლება გაიზარდოს გახანგრძლივებული შიმშილით, ალკოჰოლის ჭარბი მოხმარებით, დეჰიდრატაციით, ინსულინის დოზის უეცარი შემცირებით, ან ინსულინის უფრო მაღალი მოთხოვნილებით მნიშვნელოვანი ქირურგიული ჩარევის ან მძიმე დაავადების გამო.
დაპალიფით მკურნალობისას, დიაბეტური კეტოაციდოზი შეიძლება განვითარდეს იმ შემთხვევაშიც კი, თუ სისხლში შაქრის დონე ნორმალურია.
დიაბეტურ კეტოაციდოზზე ეჭვის არსებობის შემთხვევაში, დაუყოვნებლივ დაუკავშირდით ექიმს ან უახლოეს საავადმყოფოს და არ მიიღოთ ეს პრეპარატი.
შორისის მანეკროზებელი ფასციიტი:
დაუყოვნებლივ მიმართეთ თქვენს ექიმს, თუ განვითარდა ისეთი სიმპტომების კომბინაცია, როგორიცაა ტკივილი, მგრძნობელობა, გენიტალიების ან გენიტალიებს შორის მიდამოს და ანუსის სიწითლე ან შეშუპება ცხელებითა და ზოგადი უსიამოვნო შეგრძნებით. ეს სიმპტომები შეიძლება იყოს იშვიათი, თუმცა მძიმე ან სიცოცხლისთვის სახიფათო ინფექციის ნიშნები, რასაც შორისის მანეკროზებელი ფასციიტი ან ფურნიეს განგრენა ეწოდება და რაც ანადგურებს ქსოვილს კანქვეშ. ფურნიეს განგრენას დაუყოვნებელი მკურნალობა სჭირდება.
კონსულტაციისთვის მიმართეთ თქვენს ექიმს, ფარმაცევტს ან ექთანს დაპალიფის მიღებამდე:
თუ გაქვთ „ტიპი 1 დიაბეტი“ - ტიპი, რომელიც, როგორც წესი, იწყება ახალგაზრდობაში და თქვენს ორგანიზმს არ შეუძლია ინსულინის წარმოქმნა.
თუ გაქვთ დიაბეტი და თირკმელების მხრივ დარღევევა - თქვენმა ექიმმა შეიძლება გთხოვოთ დამატებითი ან სხვა პრეპარატის მიღება სისხლის შაქრის საკონტროლოდ.
თუ გაქვთ ღვიძლის მხრივ დარღვევა - თქვენმა ექიმმა შეიძლება უფრო დაბალი დოზით დაიწყოს მკურნალობა.
თუ იღებთ პრეპარატებს არტერიული წნევის დასაქვეითებლად (ანტიჰიპერტენზიულები) და ანამნეზში გაქვთ დაბალი არტერიული წნევა (ჰიპოტენზია). დამატებითი ინფორმაცია მოცემულია ქვემოთ პარაგრაფში “სხვა სამკურნალო საშუალებები და დაპალიფი“.
თუ გაქვთ სისხლში შაქრის ძალიან მაღალი დონე, რომელმაც შეიძლება გამოიწვიოს გაუწყლოება (ორგანიზმის მიერ დიდი რაოდენობის სითხის დაკარგვა). გაუწყლოების შესაძლო ნიშნები მითითებულია მე-4 პარაგრაფში. თუ გაქვთ ნებისმიერი ეს ნიშანი, დაპალიფის მიღების დაწყებამდე აცნობეთ თქვენს ექიმს.
თუ გაქვთ ან განვითარდა გულისრევა (შეუძლოდ ყოფნის შეგრძნება), ღებინება ან ცხელება, ან არ შეგიძლიათ საკვების ან სასმელის მიღება. ეს მდგომარეობები შეიძლება იწვევდეს გაუწყლოებას. თქვენმა ექიმმა შეიძლება მოგიხსნასთ დაპალიფი მდგომარეობის აღდგენამდე, რათა დავიდან იქნას აცილებული გაუწყლოება.
თუ ხშირად გაქვთ საშარდე გზების ინფექციები.
თუ ზემოთ მითითებული რომელიმე მდგომარეობა გეხებათ (ან არ ხართ დარწმუნებული), დაპალიფის მიღებამდე კონსულტაციისთვის მიმართეთ თქვენს ექიმს, ფარმაცევტს ან მედდას.
დიაბეტი და ტერფების მოვლა
თუ გაქვთ დიაბეტი, მნიშვნელოვანია ტერფების რეგულარული შემოწმება და ტერფების მოვლასთან დაკავშირებით თქვენი სამედიცინო სპეციალისტის მიერ გაცემული ნებისმიერი რეკომენდაციის დაცვა.
გლუკოზა შარდში
დაპალიფის მოქმედებიდან გამომდინარე, შაქარზე შარდის ანალიზი შეიძლება იყოს დადებითი ამ პრეპარატით მკურნალობის პერიოდში.
ბავშვები და მოზარდები
დაპალიფის გამოყენება შეიძლება 10 წლის და უფროსი ასაკის ბავშვებში ტიპი 2 დიაბეტის სამკურნალოდ. 10 წლამდე ასაკის ბავშებში მონაცემები რა არის.
დაპალიფი არ არის რეკომენდებული ბავშვებისა და 18 წლამდე ასაკის მოზარდებისათვის გულის უკმარისობის ან თირკმელების ქრონიკული დაავადების სამკურნალოდ, რადგან პაციენტების ამ ჯგუფში ის შესწავლილი არ არის.
სხვა პრეპარატები და დაპალიფი
აცნობეთ თქვენს ექიმს, ფარმაცევტს ან ექთანს, თუ ღებულობთ, ახლო წარსულში მიიღეთ ან შეიძლება მიიღოთ ნებისმიერი სხვა პრეპარატი.
განსაკუთრებით აცნობეთ თქვენს ექიმს, თუ:
ღებულობთ პრეპარატებს, რომლებიც გამოიყენება ორგანიზმიდან სითხის გამოსაყოფად (დიურეზული საშუალება).
ღებულობთ სხვა მედიკამენტებს, რომლებიც აქვეითებს სისხლში შაქრის რაოდენობას, როგორიცაა ინსულინი ან „სულფონილშარდოვანას“ პრეპარატი. თქვენმა ექიმმა შეიძლება საჭიროდ ჩათვალოს ამ სხვა პრეპარატების დოზის შემცირება, სისხლში შაქრის შემცველობის დაბალი დონეების (ჰიპოგლიკემიის) თავიდან აცილების მიზნით.
თუ იღებთ ლითიუმს, რადგან დაპალიფმა შეიძლება შეამციროს სისხლში ლითიუმის რაოდენობა.
ორსულობა და ძუძუთი კვება
თუ ხართ ორსულად ან ბავშვს ძუძუთი კვებავთ, ფიქრობთ, რომ ხართ ორსულად, ან გეგმავთ დაორსულებას, ამ პრეპარატის მიღებამდე კონსულტაციისთვის მიმართეთ თქვენს ექიმს ან ფარმაცევტს. დაორსულების შემთხვევაში პრეპარატის მიღება უნდა შეწყვიტოთ, ვინაიდან მისი გამოყენება არ არის რეკომენდებული ორსულობის მეორე და მესამე ტრიმესტრების დროს. გაესაუბრეთ თქვენს ექიმს ორსულობის დროს სისხლში შაქრის კონტროლის საუკეთესო მეთოდების შესახებ.
აცნობეთ თქვენს ექიმს, თუ გსურთ ძუძუთი კვების დაწყება ან ბავშვს ძუძუთი კვებავთ ამ პრეპარატის მიღებამდე. არ გამოიყენოთ დაპალიფი, თუ ბავშვს ძუძუთი კვებავთ. უცნობია, გადადის, თუ არა ეს პრეპარატი დედის რძეში.
სატრანსპორტო საშუალებების მართვა და მექანიზმებთან მუშაობა
დაპალიფი არ ახდენს რაიმე ზეგავლენას ან უმნიშვნელოდ მოქმედებს სატრანსპორტო საშუალებების მართვისა და მექანიზმებთან მუშაობის უნარზე.
ამ პრეპარატის მიღებამ სხვა პრეპარატებთან, მაგალითად, სულფონილშარდოვანასთან ან ინსულინთან ერთად, შეიძლება გამოიწვიოს სისხლში შაქრის დონის ძალიან დაქვეითება (ჰიპოგლიკემია), რამაც შეიძლება გამოიწვიოს ისეთი სიმპტომები, როგორიცაა კანკალი, ოფლიანობა და მხედველობის ცვლილება, და შეიძლება გავლენა მოახდინოს სატრანსპორტო საშუალებების მართვისა და მექანიზმებთან მუშაობის უნარზე.
თუ დაპალიფის მიღებისას იგრძენით თავბრუსხვევა, სატრანსპორტო საშუალებების მართვა ან მექანიზმებთან მუშაობა არ შეიძლება.
დაპალიფი შეიცავს ლაქტოზას
დაპალიფი შეიცავს ლაქტოზას (რძის შაქარს). თუ თქვენი ექიმი გაცნობებთ, რომ გაქვთ ზოგიერთი შაქრის მიმართ აუტანლობა, ამ პრეპარატის მიღებამდე დაუკავშირდით თქვენს ექიმს.
როგორ მიიღება დაპალიფი
ეს პრეპარატი ყოველთვის მიიღეთ თქვენი ექიმის დანიშნულების ზუსტად დაცვით. თუ არ ხართ დარწმუნებული, გადაამოწმეთ თქვენს ექიმთან, ფარმაცევტთან ან ექთანთან.
დოზირება
რეკომენდებული დოზა არის ერთი 10 მგ ტაბლეტი ყოველ დღე.
თქვენმა ექიმმა შეიძლება დაიწყოს 5 მგ დოზით, ღვიძლის პრობლემის არსებობის შემთხვევაში.
თქვენი ექიმი დაგინიშნავთ თქვენთვის შესაფერის დოზას.
პრეპარატის მიღების წესი
ტაბლეტი გადაყლაპეთ მთლიანად ნახევარი ჭიქა წყლის მიყოლებით.
ტაბლეტის მიღება შეიძლება საკვებთან ერთად ან საკვების გარეშე.
ტაბლეტის მიღება შეგიძლიათ დღის ნებისმიერ მონაკვეთში. თუმცა, ეცადეთ მიიღოთ ყოველი დღის ერთსა და იმავე დროს. ეს დაგეხმარებათ, რომ არ დაგავიწყდეთ მისი მიღება.
თქვენმა ექიმმა დაპალიფი შეიძლება დანიშნოს სხვა პრეპარატ(ებ)თან ერთად. არ დაგავიწყდეთ ამ სხვა პრეპარატ(ებ)ის მიღება ექიმის დანიშნულების მიხედვით. ეს დაგეხმარებათ თქვენი ჯანმრთელობისათვის საუკეთესო შედეგების მიღწევაში.
დიეტა და ვარჯიში დაეხმარება თქვენს ორგანიზმს, უკეთესად აითვისოს სისხლში არსებული შაქარი. თუ გაქვთ დიაბეტი, დაპალიფით მკურნალობისას, მნიშვნელოვანია დაიცვათ თქვენი ექიმს მიერ რეკომენდებული დიეტა და ვარჯიშის პროგრამა.
თუ მიიღეთ დაპალიფის საჭიროზე მეტი დოზა
თუ მიიღეთ დაპალიფის ტაბლეტების საჭიროზე მეტი დოზა, დაუყოვნებლივ მიმართეთ ექიმს ან საავადმყოფოს. თან იქონიეთ პრეპარატის შეფუთვა.
თუ დაგავიწყდათ დაპალიფის მიღება
ის, თუ რა უნდა მოიმოქმედოთ იმ შემთხვევაში, თუ დაგავიწყდათ ტაბლეტის მიღება, დამოკიდებულია იმაზე, თუ რა დრო არის დარჩენილი მომდევნო დოზის მიღებამდე.
თუ მომდევნო დოზამდე დარჩენილია 12 საათი ან მეტი, დაპალიფის დოზა მიიღეთ, როგორც კი გაგახსენდებათ. შემდეგ მომდევნო დოზა მიიღეთ ჩვეულ დროს.
თუ მომდევნო დოზამდე დარჩენილია 12 საათზე ნაკლები, გამოტოვეთ ეს დოზა. შემდეგ მიიღეთ მომდევნო დოზა ჩვეულ დროს.
არ მიიღოთ დაპალიფის ორმაგი დოზა გამოტოვებული დოზის კომპენსაციის მიზნით.
თუ შეწყვიტეთ დაპალიფის მიღება
არ შეწყვიტოთ დაპალიფის მიღება ექიმთან კონსულტაციის გარეშე. თუ გაქვთ დიაბეტი, სისხლში შაქრის დონე შეიძლება გაიზარდოს ამ პრეპარატის გარეშე.
პრეპარატის მიღებასთან დაკავშირებით ნებისმიერი დამატებითი შეკითხვის არსებობის შემთხვევაში, მიმართეთ თქვენს ექიმს, ფარმაცევტს ან ექთანს.
შესაძლო გვერდითი მოქმედება
როგორც ყველა სამკურნალო საშუალებას, მოცემულ პრეპარატსაც შეუძლია გამოიწვიოს გვერდითი მოქმედება, თუმცა ის არ ვლინდება ყველა პაციენტში.
დაუყოვნებლივ მიმართეთ ექიმს ან უახლოეს საავადმყოფოს ქვემოთ აღწერილი ნებისმიერი გვერდითი მოვლენის განვითარების შემთხვევაში:
ანგიონევროზული შეშუპება, რომელიც იშვიათად აღინიშნება (შესაძლოა აღენიშნოს 10 000-დან არაუმეტეს 1 ადამიანს).
ანგიონევროზული შეშუპების ნიშნებია:
სახის, ენის ან ყელის შეშუპება
ყლაპვის გაძნელება
ჭინჭრის ციება და სუნთქვის პრობლემები
დიაბეტური კეტოაციდოზი - იშვიათია ტიპი 2 დიაბეტის მქონე პაციენტებში (შესაძლოა აღენიშნოს 1 000-დან არაუმეტეს 1 ადამიანს).
დიაბეტური კეტოაციდოზის ნიშნებია (იხილეთ ასევე პარაგრაფი 2 „გაფრთხილება და სიფრთხილის ზომები“):
სისხლში ან შარდში „კეტონური სხეულების“ დონის მომატება
შეუძლოდ ყოფნის შეგრძნება ან შეუძლოდ ყოფნა
ტკივილი კუჭის არეში
ძლიერი წყურვილი
სწრაფი და ღრმა სუნთქვა
დაბნეულობა
უჩვეულო ძილიანობა და დაღლილობა
ამოსუნთქვისას ტკბილი სუნი, ტკბილი ან ლითონის გემო პირში ან შარდის ან ოფლის განსხვავებული სუნი
წონაში სწრაფი კლება.
ეს შეიძლება განვითარდეს სისხლში შაქრის დონის მიუხედავად. თქვენი ექიმი გადაწყვეტს, დროებით შეაჩეროს ან საერთოდ შეწყვიტოთ დაპალიფით თქვენი მკურნალობა.
შორისის მანეკროზებელი ფასციიტი ან ფურნიეს განგრენა, გენიტალიების ან გენიტალიებსა და ანუსს შორის რბილი ქსოვილის მძიმე ინფექცია, რომელიც ძალიან იშვიათად ფიქსირდება.
შეწყვიტეთ დაპალიფის მიღება და შეძლებისდაგვარად სწრაფად დაუკავშირდით ექიმს, თუ შენიშნავთ შემდეგი გვერდითი მოვლენების განვითარებას:
საშარდე გზების ინფექცია, რომელიც ხშირად აღინიშნება (შესაძლოა აღენიშნოს 10- დან არაუმეტეს 1 ადამიანს). საშარდე გზების მძიმე ინფექციის ნიშნებია:
ცხელება და/ან შემცივნება
წვის შეგრძნება შარდვისას
წელის ან გვერდების ტკივილი.
მიუხედავად იმისა, რომ ხშირი არ არის, შარდში სისხლში შემჩნევისას, დაუყოვნებლივ დაუკავშირდით თქვენს ექიმს.
დაუყოვნებლივ დაუკავშირდით თქვენს ექიმს, თუ გაქვთ რომელიმე ქვემოთ აღწერილი გვერდითი მოვლენა:
სისხლში შაქრის დაბალი დონე (ჰიპოგლიკემია), რაც ძალიან ხშირად აღინიშნება (შესაძლოა აღენიშნოს 10-დან 1-ზე მეტ პაციენტს) დიაბეტის მქონე პაციენტებში, რომლებიც ამ პრეპარატს ღებულობენ სულფონილშარდოვანასთან ან ინსულინთან ერთად.
სისხლში შაქრის დაბალი შემცველობის ნიშნებია:
კანკალი, ოფლიანობა, შფოთვის შეგრძნება, აჩქარებული გულისცემა
შიმშილის შეგრძნება, თავის ტკივილი, მხედველობის შეცვლა
გუნება-განწყობის შეცვლა ან დაბნეულობა.
თქვენი ექიმი გირჩევთ, თუ როგორ უმკურნალოთ სისხლში შაქრის დაბალ შემცველობას და რა უნდა გააკეთოთ ზემოთ აღწერილი ნებისმიერი ნიშნის განვითარების შემთხვევაში.
სხვა გვერდითი მოვლენები დაპალიფის მიღებისას:
ხშირი
პენისის ან საშოს ინფექციები (რძიანა) (ნიშნები შეიძლება მოიცავდეს გაღიზიანებას, ქავილს, უჩვეულო გამონადენს ან სუნს)
ზურგის ტკივილი
უფრო დიდი რაოდენობის სითხის (შარდის) გამოყოფა ან უფრო ხშირი შარდვის სურვილი
სისხლში ქოლესტერინის ან ცხიმების რაოდენობის ცვლილებები (ნაჩვენებია ანალიზებში)
სისხლში ერითროციტების რაოდენობის მომატება (ნაჩვენებია ანალიზებში)
კრეატინინის თირკმლისმიერი კლირენსის დაქვეითება (ნაჩვენებია ანალიზებში) მკურნალობის დასაწყისში
თავბრუსხვევა
გამონაყარი
არახშირი (შესაძლოა აღენიშნოს 100-დან არაუმეტეს 1 ადამიანს)
ორგანიზმიდან დიდი რაოდენობით სითხის დაკარგვა (გაუწყლოება, რომლის ნიშნები შეიძლება იყოს ძალიან მშრალი ან წებოვანი პირი, შარდის მცირე რაოდენობით გამოყოფა ან ანურია ან აჩქარებული გულისცემა)
წყურვილი
შეკრულობა
ღამით გაღვიძება მოსაშარდად
პირის სიმშრალე
წონაში კლება
კრეატინინის მომატება (ნაჩვენებია სისხლის ლაბორატორიული ანალიზებით) მკურნალობის დასაწყისში
შარდოვანას მომატება (ნაჩვენებია სისხლის ლაბორატორიული ანალიზებით)
ძალიან იშვიათი
თირკმელების ანთება (ტუბულოინტერსტიციული ნეფრიტი)
დაპალიფის შენახვისპირობები
მოცემული პრეპარატი შეინახეთ ბავშვებისთვის მიუწვდომელ ადგილზე.
არ გამოიყენოთ მოცემული პრეპარატი ვარგისობის ვადის გასვლის შემდეგ, რომელიც მითითებულია ბლისტერზე ან მუყაოს შეფუთვაზე წარწერა “ვარგისია“-ს შემდეგ. ვარგისობის ვადა გულისხმობს მითითებული თვის ბოლო დღეს.
შეინახეთ 25˚C-ზე დაბალ ოთახის ტემპერატურაზე.
არ გადააგდოთ სამკურნალო საშუალებები კანალიზაციის მილში ან საყოფაცხოვრებო ნაგავთან ერთად. არასაჭირო პრეპარატების უტილიზაციის საკითხთან დაკავშირებით მიმართეთ თქვენს ფარმაცევტს. ეს ზომები ხელს შეუწყობს გარემოს დაცვას.
შეფუთვის შიგთავსი და დამატებითი ინფორმაცია
რას შეიცავს დაპალიფი
მოქმედი ნივთიერება არის დაპაგლიფლოზინი.
დაპალიფი 5 მგ აპკიანი გარსით დაფარული თითოეული ტაბლეტი შეიცავს 5 მგ დაპაგლიფლოზინს.
დაპალიფი 10 მგ აპკიანი გარსით დაფარული თითოეული ტაბლეტი შეიცავს 10 მგ დაპაგლიფლოზინს.
დამხმარე ნივთიერებებია:
ტაბლეტის ბირთვი: მაკროგოლები (პოლიგლიკოლი 20000 P (პეგ 20000)), მიკროკრისტალური ცელულოზა PH 101, მიკროკრისტალური ცელულოზა PH 102, ნატრიუმის კროსკარმელოზა, სილიციუმის დიოქსიდი, კოლოიდური უწყლო (აეროსილ 200), მაგნიუმის სტეარატი.
აპკიანი გარსი: აპკიანი გარსის მასალა No.109 (Opadry 03F220114 ყვითელი ფხვნილი: (ჰიდროქსიპროპილმეთილცელულოზა (HPMC) 2910/ჰიპრომელოზა, ტიტანის დიოქსიდი, მაკროგოლი/პეგ, რკინის ყვითელი ოქსიდი).
დაპალიფის აღწერა და შეფუთვის შიგთავსი
დაპალიფი 5 მგ და 10 მგ აპკიანი გარსით დაფარული ტაბლეტი: ორმხრივამოზნექილი, მრგვალი ფორმის, ყვითელი ფერის აპკიანი გარსით დაფარული ტაბლეტები.
დაპალიფი 5 მგ და 10 მგ ტაბლეტები გამოდის ალუმინის ფორმატურის-ალუმინის ფოლგის ბლისტერულ შეფუთვაში, რომელიც შეიცავს აპკიანი გარსით დაფარულ 28 ან 90 ტაბლეტს.
შეიძლება, გაყიდვაში ყველა ზომის შეფუთვა არ იყოს წარმოდგენილი.
სად შევიძინოთ?