რა არის რენტგენოლოგიური კვლევა და როგორ ტარდება ის?
თარიღი: 13 თებერვალი, 2020
“რენტგენზე მივდივარ”- რა არის რენტგენოლოგიური კვლევა და როგორ ტარდება ის?
ყველაფერი 1895 წელს დაიწყო, როცა გერმანელმა მეცნიერმა ვილჰელმ რენტგენმა იქს- სხივები აღმოაჩინა, რასაც მისი სახელი დაერქვა და რენტგენმა აღმოჩენისათვის 1901 წელს ფიზიკის დარგში ნობელის პრემია მიიღო!
რენტგენოლოგიური კვლევა ემყარება გამჭოლი გამოსხივების გამოყენებას ორგანოთა და ჩონჩხის დათვალიერებისათვის. მისი მეთოდებია:
- რენტგენოსკოპია, როცა გამოსახულება ეკრანზე მიიღება რეალურ დროში
- რენტგენოგრაფია, როცა გამოსახულება ფირზე იბეჭდება.
ციფრული რენტგენოგრაფია საშუალებას იძლევა მიღებული გამოსახულება კომპაქტურ დისკზეც ჩავწეროთ.
როგორ ტარდება კვლევა?
- ბავშვს სპეციალურ მაგიდაზე დააწვენენ, საჭირო უბნის დასხივებით ექიმი ეკრანზე გამოსახულებას იღებს, რომლის განხილვის შემდეგ მისი ბეჭდვა ან დისკზე გადატანა ხდება.
- ზოგჯერ ორგანოთა დასათვალიერებლად კონტრასტის გამოყენებაა საჭირო, რომელიც შესაძლოა ვენაში ან უშუალოდ საკვლევ ორგანოში შეიყვანონ.
უნდა გვეშინიდეს თუ არა დასხივების?
- თანამედროვე ციფრული აპარატები დასხივების მცირე დოზას იყენებენ, რაც საფრთხეს არ წარმოადგენს.
-კვლევის ბოლოს ექიმი მოგცემთ ინფორმაციას დასხივების გამოყენებული დოზის შესახებ.
სტატიის ავტორი: “ავერსის კლინიკის” პედიატრიული სამსახურის უფროსი, აკადემიური დოქტორი მედიცინაში თამარ ობგაიძე